تصدرت الفنانة داليا البحيري تريند مؤشر البحث جوجل بعد تصريحاتها المثيرة للجدل مؤخرًا والتي انتقدت خلالها الزحام في الشوارع.

وكتبت داليا من خلال حسابها على فيسبوك: "أنا محبوسة في البيت أنا وأهلي داخلين على 36 يوم وزينا ناس محترمة كتير، ولو لا قدر الله حد فينا تعب مانلاقيش سرير في مستشفى عشان واحد حيوان كان مقضيها خروج بيتفسح ولا كان على باله اللي إحنا فيه".

وتابعت: "حظر كامل يا ريس لو سمحت أرجوك، واللي حيقولي العمالة اليومية حديله بالشبشب على بقه أنا فاض بيا! أولا معظم المؤسسات الخيرية -وبقول معظم مش كل- بدأوا يشحتوا عليهم من قبل ما رمضان يبدأ، فمحدش يقولي مش حيلاقوا يأكلوا، وكتير منهم بنتحايل عليهم يشتغلوا أصلا طول السنة! خلينا صادقين مع نفسنا شوية كدة والنبي! واللي بيشتغلوا في مصانع على عيني وراسي يتعملهم إقامة داخل محل عملهم! غير كدة احنا رايحين في داهية".

ما كتبته داليا البحيري جعلها تتعرض لانتقادات كثيرة دفعها لنشر مقطع فيديو لها تبرر موقفها وقالت من خلاله: "قررت أعمل فيديو حتى لا يتم تحريف كلامي، وأنا عملت بوست على برايفت أكونت والبوست كان للأصدقاء فقط يعني مش بابليك فا كنت بتكلم بأريحية كأني قاعدة مع أصحابي، لكن في صحفي عندي على الأكونت أخد الكلام ده واستقطع منه جملة تستفز الناس وحطها عنوان".

وتابعت: "أيوا ده الأكونت بتاعي وأنا ما قولتش حاجة أخجل منها أنا كل اللي طلبته في البوست إن يبقى في حظر كامل، لأن امبارح في ناس كتير جدا نزلت تتسوق في المولات والعتبة والموسكي، ده رد فعلي أنا وناس كتير جدا زيي عايزة تقول نفس الكلام، لكن كالعادة أي حد من الوسط بيتهاجم بشكل شرس مع إننا في خط الدفاع الأول في أي حاجة تواجه البلد".

وأضافت : "لازم نبقا إيد واحدة، لازم نوعي الناس البسيطة.. بس لما الاقي الأفعال دي من ناس المفروض إنها مثقفة وفاهمة ومش مضطرة إنها تنزل خالص من البيت مش زي ما اتقال إني بهاجم العمالة اليومية ده مش حقيقي.. أنا من أول الناس اللي عملوا حملة مع بنك الطعام لدعم العمالة اليومية وفي مؤسسات كتير دعمتهم".

واختتمت حديثها: "ما أظنش في أي حاجة من اللي أنا قولتها دي ممكن تضايق أي حد، وبعذر أي حد دخل وهاجمني وقال كلام مش مظبوط في حقي لأن العنوان اللي اتكتب فعلا مستفز".

هذه ليست الأزمة الأولى التي تعرضت لها داليا البحيري فسبق وهاجمت محمد أبو تريكة وكتبت :"إرهابي ووشه فيه خبث الفلاحين" ولكن ما كتبته عرضها لهجوم شرس لم تكن تتوقعه دفعها للاعتذار .

وأضافت: "أما للتوضيح، فالتدوينة التي نشرت على حسابي الخاص –أكرر حسابي الخاص حيث إنني لا أمتلك صفحة عامة- على فيس بوك لا تخرج عن كونها مكايدة ودعابة لبعض أفراد عائلتي وأصدقائي من محبي اللاعب محمد أبو تريكة وليس من أجل التجريح أو الإساءة".

أما الأزمة الثالثة التي طاردت داليا البحيري كان خلافها مع أنغام خلال تصوير مسلسل "في غمضة عين" واتهامها للمطربة بأنها لا تفهم شيء بمجال التمثيل الأمر الذي جعلها تتعرض لهجوم شديد من جمهور أنغام لم تكن تتوقعه .